كتبت في ملاحظة سابقة بإسم "المقابلات الشخصية .. قصص و مغامرات" عن بعض المواقف إلي مرت عليه في التوظيف و في المقابلات الشخصية ، و في هاذي الملاحظة بأكتب عن موضوع يتقاطع ((ملعوووبه يتقاطع)) مع الملاحظة السابقة في بعض النقاط .
و أنا أقلب في الإنترنت شفت أكثر من موقع فيها مواضيع تتكلم عن القهر إلي يعيش فيه السعودي تحت إدارة الأجانب .. و كيف إنه بعض السعوديين رافضين إنهم يشتغلوا تحت إدارة أجنبي ، و كيف إنه الأجنبي له كل المميزات و السعودي ماله و لا شي و جلست أفكر ...
كم واحد فينا إشتغل في شركة و كان مديره أجنبي ؟
كم واحد فينا إشتغل تحت إدارة أجنبي يأخذ أكثر من ضعف راتبه .. و يأخذ مميزات ما يحلم فيها .. غير الزيادات و خلافة .. ما تنقهر ؟ ما ينرفع ضغطك إنك في بلدك و فيه أجنبي مدير عليك ؟ إنك في بلدك و فيه واحد جاي من برى و يعيش عيشه إنت ما تحلم فيها ؟
و على فكره حتى هو قبل ما يجي هنا ما عمره كان يحلم فيها .
طيب .. إيش سويت علشان تطلع من القهر و حرقة الدم إلي إنت فيها ؟؟؟
أنا أقولكم بعض الأمثلة على تصرفاتنا إحنا السعوديين في هاذي الحالة ..
- يا نتمنذل على مديرنا و ما نسويله الشغل .
- يا نتضارب معاه .
- يا نروح نشتكيه لمديره .
- إذا ما كان يفهم عربي نجلس نسبسبه بالعربي من تحت لتحت .
- و إذا مره كبرررت كبرررررت .. نروح مكتب العمل و نقول إنه "فلان الفلاني" شغال في الشركة و ما هو ناقل كفاله علشان يجوا يطبوا على الشركة .. و على أمل إنهم يمسكوه يوم و لا يومين أو يرحلوه إذا كان فعلاً ما هو ناقل كفالة .
الواحد فينا ما يصدق مديره الأجنبي يزعقله إلا على طول تجي في باله "آهاااا علشان أنا سعودي" .. الواحد فينا ما يصدق يشوف مديره الأجنبي يعامل زميله الأجنبي كويس إلا تجي في باله "آهاااا علشان أجانب زي بعض.. و أنا سعودي".
محد عمره قال يمكن زميلي شغله أحسن مني .. يمكن أنا مقصر .. يمكن .. يمكن .. لا لا لا كلللله علشان أنا سعودي و هوه أجنبي .
نحلل الموضوع من الأساس ...
ليش الأجنبي ماسك الوظيفة هاذي ؟؟
في أغلب الأحوال لأنه عنده خبرات و إمكانيات ماهي متوفرة عند ولد البلد ، أوووو متوفرة بسعر عالي جداً عند ولد البلد .
الأجنبي ليش جاي من بلده لهنا ؟؟
علشان لقمة العيش إلي ما يحلم فيها في بلده .
ليش إنت شغال تحت إدارة هذا الأجنبي ؟؟
في الأغلب لأنه عنده خبره أحسن منك .. متعلم أحسن منك .. مجتهد أكثر منك .. إلخ .
هل معقول الأجنبي بيحطك في رأسه و إنت ممكن لا قدر الله إنك تسويله مشكله و يطلع بسببها من البلد و ينحرم من لقمة العيش هاذي ؟
صدقني ما هو مستعد يخاطر .. فكر فيها .
بشكل عام و حسب رأيي الشخصي .. إحنا السعوديين عندنا ثلاث مشاكل في العمل :
- ما نحترم مناصب غيرنا ((يعني نكلم المدير العام زي ما نكلم القهوجي)) .
- آآآآخر شي نحطه في الحسبه هو شغلنا و نحسب إنه بما إننا نجي في وقتنا و نخرج في وقتنا و ما نغيب معناها مأدين عملنا .. محد فينا يفكر إيش أنتج و هوه في عمله .. أهم شي إنه كان معبي كرسي .
- أهم شي عندنا ((كم الرااااتب)) مو مهم إيش الوظيفة و لا بنوصل لإيش من هاذي الوظيفة .
هل معقول إنه الشركات تعطيهم هاذي الرواتب لسواد عيونهم ؟
هل تعطيهم هاذي المميزات نكاية في السعودي ؟
و حسب ما شفت في 6 شركات إشتغلت فيها خلال تقريباً 4 سنوات .. الشركات يفضلوا السعودي علشان السعوده و يرتاحوا من موضوع الفيز و نقل الكفاله و خلافه .. بس لو الأجنبي بينتج أحسن من السعودي بيوظفوه ، أهمممم شي الإنتاج .
حاس إني مررره طولت المره هاذي .. فخلاص نقسم الملاحظة هاذي جزئين ، الجزء الثاني بيكون كله حكاوي .. بأحكيكم حكايتي مع المدراء الأجانب و حكاية أكبر إنجاز لي في حياتي العملية ((بسسس يا خبرة 20 سنه .. كلها 4 سنين)) .
الزبدة:
- وجود الأجنبي لاااازم يقهرك علشان يخليك تشد حيلك في عملك و تخلي البلد تستغني عنه .. مو تدور مشاكل معاه .
- المسؤول الأول عن وضعك هو أنت .. فإذا مو عاجبك غييييره .
- أغلبية الأجانب كل همهم شغلهم .. خلوا عنكم نظرية المؤامرة و الشك في كل شي .
- بأقولها بالفصحى .. لندع عنا اللطم و البكبكه و لنشد حيلنا في عملنا حتى نصل ((هاذي فصحى ؟)) .
إنتزرونا في الحلكة الكادمة
