أنا يصير مديري هندي ؟ يخسي (2) قصتي

تكلمت في الجزء الأول من الملاحظة "أنا يصير مديري هندي ؟ يخسي (1)"  عن موضوع العمل تحت إدارة أجنبي و قد إيش البعض يعتبره عيب و ذل و .. و .. و .. إلخ ، و أعطيت رأيي في هذا الموضوع .

و في هذا الجزء بأحكيكم حكايتي و إلي لها علاقة بالموضوع هذا .. إحم .. كان يا ما كان ((دخل جو)) .

بعد سنتين كطالب منتظم في الجامعة .. طفشت من الدراسة و قررت إني أغير دراستي لإنتساب و أبدأ أشتغل ، صح إني بأدفع 3 ألاف في الترم بدل ما أنا حالياً أخذ مكافأة بس أكيد بألقى وظيفة محترمه بأقدر أغطي منها حق الجامعة .

* لقيت أول وظيفة .. مسوق عن طريق الهاتف ، دوامين ، راتبها 2000 ريال ، كان لنا مديرين واحد هندي و واحد سعودي .. ضحكوا عليه و ما أعطوني راتب لمدة 4 شهور و بعدين أعطوني 1000 ريال .. يعني ((1000 ريال قسمة 4 شهور)) 250 ريال في الشهر .. و لا حق غسيل الثياب و الأكل .

طبعاً تركت الشغل و بدأت أدور عن وظيفة ثانية ..

** بعدها بشهر .. توظفت بمسمى موظف خدمة عملاء عن طريق الهاتف و بنفس الراتب 2000 ريال ، و كان مديري شاب سعودي .

بعد 8 شهور نقلوني لقسم الموارد البشرية و كنت لحالي في القسم مسؤول عن معاملات 85 موظف .. و صار مديري المباشر صاحب الشركة ، كنت أطالبه ببعض حقوق الموظفين و هو رافض يعطيهم إياها .. فإستقلت .

مخ تكارين .. أو قصمان بالأحرى .. إذا قفلت قفلت .. ما أحب أسوي شي ماني راضي عن نفسي فيه .

*** بعد الإستقالة بثلاثة أسابيع جاني عرض عمل في الموارد البشرية في شركة بن زقر بمسمى مساعد موارد بشرية ، عندي مديرين مدير سعودي و مدير سوداني ، و بصراحه ماناسبني مجال الموارد البشرية من أساسه و كنت أدور الفكة منه و بعد شهرين و نص ماااا صدقت جاني عرض ثاني .. شلت عفشي و مشيت .

**** ذحييين رجعت للمجال إلي أكيف عليه مركز إتصال Call Center .. قائد فريق .. يعني عندي مجموعة موظفين أنا مسؤول عنهم ، و إدارتي كلها ناس عندهم خبره و جايبينهم من الهند .

كانت عندي مشكلة كبيييره في بداية عملي في الشركة ... مديري كان يأخذ رأيي .. كان يطلب مني أحياناً أسوي أشياء ((حسب ما أنا أشوفه مناسب و حسب خبرتي)) ، في البداية إعتبرتهم كلهم أغبياء لأنهم كانوا يطلبوا مني ((أفكر)) .

خلال شهر تعلقت بعملي و حبيت أسلوب إدارتي في التعامل معي .. كيف لي مساحة أنفذ فيها براحتي .. كيف إنه لي فرصه أتعلم .. و أهم شي كيف إنه لي فرصه ((أفكر)) ، و بدأت أنتقل من مرحلة إني أكون مجرد منفذ "Doer" إلى إني أكون مفكر أو مخطط "Thinker" .

من حبي للعمل صرت أيام إختباراتي النهائية في آخر ترم في الجامعة أجي أداوم مع إنه مكتب العمل يعطيني إجازه و الشركة تسمحلي بس صرت أداوم حتى لو ساعتين في اليوم و الحمدلله الكل كان يحترم الشي هذا .

أذكر موقف من المواقف إلي أعتبرها وسام على صدري مديري ((الهندي)) كان يكلم أخصائي التوظيف في الموارد البشرية يقوله تأخرت علينا في التوظيف .. فأخصائي التوظيف يتعذرله ..

أخصائي التوظيف : إحنا جالسين ندورلك واحد ممتاز Special .. ما نبغى نجبلك واحد عادي .

مديري : يا أخي جيبلي واحد عادي ما هي مشكله .. يكفيني عندي واحد Special ((يأشر عليه)) .

و الحمدلله قضيت في الشركة أحلى 14 شهر في حياتي و تعلمت كثييييير .. لدرجة إنه صارت كل فترة تجيني عروض من شركات كبيرة زي موبايلي و البنك الأهلي و غيرها بس ما كنت أوافق .

بعدها عاد يوم شفت إني مطلوب كبرت في رأسي ... يا يرقوني و يزيدوا راتبي يا بأمشي ، و بما إن الشركة كانت لسه جديده و عمرها أقل حتى من سنه و نص كان فيه صعوبه يزيدوني و لا كان فيه حجم عمل يسمح إني أترقى .. فقررت أقبل أول عرض عمل يجيني و فعلاً جاني عرض عمل ممتاز فإستقلت .. و قبل ما أطلع من الشركة صارت بيني و بين مدير مديري ((رئيس القسم)) ((برضه هندي)) مشكلة كبيرة وصلت للسب و رفع الصوت .. يعلم الله كان معايه حق .. بس برضه لسه ندمان لأني ما مسكت أعصابي .

و خرجت من الشركة بإنجازات الحمدلله أرفع رأسي فيها و أهم من كذا بصديق من أقرب الأصدقاء لي حالياً و هو مديري الهندي إلي ما نتفق أنا وياه لا في جنسية و لا لغة و لا حتى ديانه .

***** رحت لشركة عبداللطيف جميل .. مدير مراقبة الجودة في مركز الإتصال ، تقريباً ضعف الراتب إلي كنت أخذه .. بعد ما كنت قبل أقل من سنتين موظف خدمة عملاء في شركة صغيره .. صرت مدير قسم في وحده من أكبر الشركات في المملكة ، و حسب ما ذكرلي موظف الموارد البشرية .. ثاني أصغر مدير قسم في تاريخ عبداللطيف جميل ((24 سنه)) .. و كان مديري برضه هندي .

و بحكم إني تعودت إني أكون منتج و لي تأثير و أشتغل في بيئة عمل عندها العقلية هاذي في الشركة السابقة تعبت كثير في وظيفتي هاذي لأنه الشركة كلها ماشيه زيها زي القطاعات الحكومية ((مشي حالك)) ، و مديري يخاف من مديره السعودي فما يبغاني أسوي أي شي أو أقيم أي شي إلا بعد ما أخذ شوره ((يعني ما يبغاني أسوي شغلي بالعربي)) .

جلست في عبداللطيف 3 شهور .. لا شغله و لا مشغله .. ما في غير أكل و شرب .. جاني القولون .. جاني الضغط .. و قررت إنه الشغل ((أو بالأصح قلة الشغل)) ما يسوى أضيع صحتي علشانه .. و إستقلت .

كنت على تواصل طول هاذي الفتره مع مديري السابق و بعد ما عرف إني تركت الشغل كلم مديره ((إلي صارت بيني و بينه مشكله و بغيت أذبحه في الشركه)) ..

****** إتصل فيني مديره و طلب مني أزوره في الشركه .. و وظفني مره ثانيه ، رغم إنه ما يطيقني .. و أنا وياه ما نتفق في أي شي .. لكن شغلني علشان شغلي و ادائي في عملي ، و الحمدلله براتب قريب من راتبي في عبداللطيف و بمسمى و مميزات ممتازه .

و الحمدلله ذحين مبسوط أربعه و عشرين قيراط و صارت عندي قناعه إنه أهم شي ((السعادة في العمل .. مو مهم المميزات .. أهم شي يكون لك دور)) .

و بعد حوالي 4 سنين خبره عمليه ((خالية من الواسطات)) أقدر أقولكم إنه الفرص موجوده في كل مكان بس تحتاج مين يسعى وراها و ما يتعذر بأي شي ، و إذا كنت أنا بدون واسطات و بإمكانيات محدودة و مستوى تعليمي عادي قدرت خلال 4 سنين أشتغل ((مسوق عن طريق الهاتف - ممثل خدمة عملاء - مساعد موارد بشرية - أخصائي موارد بشرية - قائد فريق - مشرف مشروع - مدير قسم)) أتوقع كثير منكم ممكن خلال 4 سنين يصير رئيس تنفيذي .

مررره طولت عليكم و لسه حتى ما حكيتكم حكاية أكبر إنجاز في حياتي العملية .. خلاص قرار نهائي .. بأسوي جزء ثالث و أخييييير للموضوع ، أعتذر منكم جــــــداً عن الإطالة .

الزبدة :

• قلتها في الجزء الأول و بأقولها مره ثانيه .. إنت المسؤول الأول و الأخير عن وضعك ، يا أخي إذا مو عاجبك ((((غييييييره)))) .. دور شغل ثاني إيش المشكله ؟؟؟
• النجاح عقلية فإذا كنت شايف إنه عقليتك عقلية ناجح و ظروفك تمنعك إنك تنجح .. غير ظروفك .. مو تغير عقليتك .
• الإتقان في العمل هو أهم شي .. حط دايماً في بالك هدف إنه مديرك ما يحتاج يراجع وراك .. حط هدف إنك تخلي مديرك يوصل لقناعة إنه الشغل إلي يجيني من "فلان أو فلانه" دايماً أحسن من إلي انا طالبه .
• طور نفسك .. إن سمعت في مكان عملك إنه الناس تتكلم عن تخطيط العمليات .. عن الجودة الشاملة .. عن الكايزن و إنته ما تدري إيش إذا إلي يتكلموا عنه أكله أو مطرب جديد روح إفتح النت و أقرى عنه .. لا تتوقع أحد يجي يجلسك على رجله و يفهمك إيش هذا .
• إلي يقولك مستحيل تشتغل في وظيفه كويسه بدون واسطه .. أعطيه كف و قوله تعال كلم عبدالله .

.... عجبي

إنتزرونا في الحلكة الأخيرة من مزلزل ((أنا يصير مديري هندي ؟ يخسي))