أنا يصير مديري هندي ؟ يخسي (3) إنجازي


و أخيييراً الجزء الأخير من هاذي الملاحظة إلي أدري إني مره طولت فيها و قسمتها لأجزاء كثيرة لكن السبب الأساسي هو إن هذا الموضوع فعلاً رافع ضغطي و جايبلي الهم في حياتي .. تلاقي شباب سعوديين عندهم إمكانيات ممتازة .. و بدل ما يشد حيله و يطور نفسه يحط قدامه عذر تافه و يوصل لقناعه إنه بسبب هذا العذر ما هو قادر يتطور ((يعني يكذب الكذبه و يصدقها)) ... ما علينا ، المهم .

تكلمت في الجزء الأول من الملاحظة عن رأيي في قضية تعذر شباب كثير إنه إداراتهم أجنبيه علشان كذا ما هم قادرين ينجزوا في عملهم ، و حكيتكم في الجزء الثاني من الملاحظة عن قصتي و عن تجربتي مع الإدارات الأجنبية ، و في هذا الجزء بأحكيكم عن قصتين بشكل سريع .. الأولى قصة أكبر إنجاز في حياتي العملية ، و الثانية قصة الموظفين إلي كنت مديرهم في شركة عبداللطيف جميل ...

يوم بدأت عملي كمشرف فريق مركز إتصال Call Center Team Leader قبل سنتين تقريباً كنت مدير 4 موظفين .. و كلنا توظفنا في نفس اليوم .

الأول : كان يشتغل ميكانيكي في شركة من شركات السيارات لمدة 4 سنوات .. ما زاد راتبه فيها و لا ريال .. ما يعرف عن
الكمبيوتر إلا إنه يحتاج كهربا .. ما عنده إنجليزي ، و جا للوظيفة هاذي مع إنه راتبها أقل من راتبه في شركة السيارات ((كان
راتبه 4000 ريال و جا براتب 3500 ريال)) .

الثاني : كان شغال موظف حجوزات طيران في مكتب سياحة .

الثالث : دوبه متخرج من الثانوي و ما عمره إشتغل غير أسبوعين في الصيف قبل كذا .

الرابع : عنده خبره ستة شهور قبل كذا .. و جاي بواسطة مدير الموارد البشرية .

و خلال أقل من 11 شهر من تاريخ توظيفنا ...

الأول : أخذ دورة طباعه على الكمبيوتر .. و دورات إنجليزي .. و تعلم على برنامج الإكسل لدرجة إنه صار يقدر يربطه
بالفيجوال بيسك و كان يداوم في اليوم 12 ساعة ((9 ساعات عمله الأساسي و 3 ساعات يجلس معايه أدربه)) ، إلى ما ترقى
لوظيفة في قسم نظم المعلومات .
الميكانيكي إلي ما عمره إشتغل على كمبيوتر و لا كان يعرف إنجليزي .. في 11 شهر إستحق إنه يشتغل في قسم نظم المعلومات إلي كل الشغل فيه يعتمد على الكمبيوتر .

الثاني : لمدة شهرين كان يداوم 12 ساعة في اليوم ((3 ساعات فوق وقت عمله يجلس معايه فيها أدربه على إدارة الجودة))
.. بعدها إحتاجت الشركة موظف مراقبة جودة ((لفترة مؤقته)) فرشحته و إشتغل في الوظيفة هاذي 3 شهور بدون زيادة راتب
و كان أكثر الأحيان يكمل شغله في البيت .. ما قال ليييش أكرف نفسي و هما ما زادوني .. و لا قال مو شغلي ، و بعدها ترقى
بشكل رسمي كمراقب جودة .

الثالث : 11 شهر ما تأخر إلا مرة وحده لمدة ربع ساعه ، 11 شهر ما غاب إلا يومين ((بعذر طبي)) و إتصل عليه يعتذر إنه
مريض .
طلب قسم الموارد البشرية شخص منضبط و أمين في عمله بحيث يكون منسق في قسم الموارد البشرية .. و رشحته .. و أخذ
الوظيفة .

الرابع : بعد 5 شهور عمل ما قدر يستحمل طبيعة العمل و التشديد على الإنضباط في المواعيد .. و ترك الشغل .

و كان هذا أكبر إنجاز في حياتي العملية إنه في شركة فيها 50 موظف .. خلال 11 شهر الموظفين الوحيدين في الشركة كلها إلي تمت ترقيتهم كانوا تحت إدارتي و أنا دربتهم ، محد فيهم ترقى بواسطه .. محد فيهم ترقى علشان عيونه الكحيله .. كل واحد فيهم إستحق ترقيته بمجهوده و بتعبه .

لمن كنت شغال في عبداللطيف جميل كان معاي في القسم 7 موظفين و أنا مديرهم .. بعضهم له سنه .. و بعضهم كمل 3 .. و فيه إثنين لهم 4 سنين .
إشتكولي من ضعف الرواتب و إشتكولي حتى من إنه مسمياتهم الوظيفية ما تطابق عملهم ، رحت أنا و قلت خليني أسوي إلي
أقدر عليه و كلمت مديري .. قالي ما نقدر نسويلهم شي إلا بعد سنه .. رحت كلمت مديره .. قالي نفس الكلام ، فرجعت و بلغتهم
بكل أمانه إيش إلي صار .
أكثر من واحد زعل و عصب و قلب القسم عندنا مسلسل كويتي كله حزن و مئاسي .. ((لنا سنين نكرف ليش ما يحسنوا وضعنا
؟ إيش السياسة المريضه هاذي ؟)) و إلى آخره ..

أنا : و الله يا شباب سويت إلي أقدر عليه بس إنتوا لا تشيلوا هم .. شدوا حيلكم و إن شاء الله ربي يسهلها .
هم : صعبه العيشه بالراتب هذا و ما في مميزات و لا شي .. نبغى نتزوج .. نبغى و نبغى ...
أنا : طيب .. ما فكرتوا تشوفوا خيارات ثانية ؟ شركات ثانية ممكن تلقوا فيها مميزات أحسن ؟
هم : لا لا .. إنت عارف .. مهما كان هاذي شركة كبيرة .
أنا : .. طيب .. مدام كذا .. كل واحد على شغله .

و على إيييش الفلم هذا كله مدام ما عندكم هرجه ؟

الزبدة :

نفس زبدة الأجزاء الماضية .. يا ليت أحد يقرى هاذي الأمثلة و يعتبر ، كل واحد بيده الخيار إنه يغير واقعه .. و لا عزاء لمن
يقرر السباحة مع التيار بحثاً عن الراحة .

... عجبي

أخيراً قلت كل إلي عندي و قفلنا الملاحظة هاذي ، أوعدكم إن شاء الله أحاول أتجنب هاذي الملاحظات المطولة .. نلتقي بكره في ملاحظة جديدة إن شاء الله ، و يا ليت إلي ناسبته هاذي الملاحظة أو غيرها ما يستحي و يشترك في المدونة .. عندك الخيارات كلها على اليمين .
في أول الصفحة تلقى خيارات الإشتراك بالإي ميل أو الخلاصة أو الفيس بوك أو التويتر .. و تحت تلقى خيار الإشتراك عن طريق قوقل .