أعرفها من عبايتها

أشتغل في شركة فيها قسم سيدات منفصل تماماً عن قسم الرجال .. حتى مدخلهم و مخرجهم منفصل عننا ، و الحمدلله كل السيدات إلي شغالين معانا بنات ناس و محترمات .. و ما أقول غير الله يديمها نعمه و يبعد عننا بعض العينات إلي تنعد على أصابع اليد الوحدة إلي ملت شركات حي الروضة .. و شارع التحلية .. و طريق الملك .. و بعض المستشفيات .. و الخالدية .. و عيادات الأسنان .. و مبنى بن حمران .. و عيادات التجميل .. و غيرها .

و مع كذا لااازم يطلعلك شي يكرهك في العمل في مكان فيه سيدات ... و للأسف في أغلب الأحيان يكون هذا الشي مو سببه السيدات .. بالعكس سببه الرجال ، مثال ....

أنا مكتبي مقابل لأربعة مكاتب .. الأربعة مكاتب هاذي كلها مواجهة للباب بين قسم الرجال و قسم السيدات .. و بالرغم من إن الموظفين في هاذي المكاتب الأربعة تغيروا أكثر من مره إلا إن كلهم عندهم نفس العادة ((مدري يمكن العيب في الكراسي)) أووووول ما يشوفوا شي لونه أسود طلع من الباب الأربعه كلهم يوقفوا يطالعوا .. مو مهم إيش هو الشي الأسود إن شاء الله فحم .. برضه حيطالعوا .

فرحت مره من المرات سويت فيها المصلح الإجتماعي و أول ما شفتهم يطالعوا قلتلهم .. يا شباب إعتبروها أختكم .. إعتبروها أمكم ((الله يخلف على أمهاتكم)) و كانت الإجابة دايماً وحده .. "ما سوينا شي .. نطالع بس" ..

أحياناً أقول الحمدلله إنهم شغالين في شركة فيها بنات محترمات .. هذول لو إشتغلوا في بعض الشركات الثانية "السابق ذكرها" كانوا بيروحوا فيها إعدام .

أحياناً لظروف العمل نضطر نحضر إجتماعات أو جلسات تدريب بوجود السيدات .. و في العادة يكون مكان جلوس الرجال في القاعه قدام .. و السيدات ورى .. و يا ليته كان العكس .

على الأقل لو كانوا الشباب ورى كان ما تكسرت رقابهم من الإلتفات .. فدامهم بيطلعوا في كل الأحوال .. بلاش نتعبهم .

بدون مبالغة لو وحده من البنات قلبت الورقة بصوت عالي الكل يلتفت .. طز في الإجتماع .. طز في التدريب .. أهم شي .. إيش الصوت هذا ؟؟؟؟

مره من المرارير كنا راجعين من الغدا أنا و بعض الزملاء .. و أول ما نزلنا من السيارة شفنا مجموعة من زميلاتنا طالعين سيارتهم ، المهم .. وصلنا مكاتبنا في أمان الله .. جلسنا و بعد دقايق جاني مديري يقول لي عندنا تدريب و جالسين نتصل على قسم السيدات علشان فلانه و ما يدرون فينها ، أنا من حسن نيه بلغته إنه شفنا بعض البنات خارجين .. يمكن تكون معاهم .

أوووول ما قلت كذا نط واحد من إلي تغديت معاهم و قال بأعلى صوت "لا .. فلانه ما كانت معاهم" و بعدها بدقيقة إتصلوا قسم السيدات و بلغونا إنهم لقوا السيدة المفقودة و ذحين بتروح غرفة الإجتماعات .

دخلت التدريب و لا أدري كان عن إيش .. بس أهز رأسي على أي شي و اللقافة ذابحتني ((الأخ هذا إيش عرفه إنها ما كانت مع البنات إلي شفناهم خارجين ؟؟؟؟ ما فيهم وحده كاشفه .. كيف فرق بينهم و عرف إنها ما كانت معاهم ؟؟؟؟)).

ما صدقت خلص الإجتماع و رحتله جري ...

أنا: سؤال واحد بس ما عندي غيره ... إيش عرفك إنها ما كانت من البنات إلي شفناهم خارجين !؟

هو: أفا عليك بس ((إبتسامة شريرة)) سر المهنه .

أنا: أقسم بالله ما أتركك إلين ما تقولي .

هو: خلاص يا أبو عابد و لا تعصب نفسك .... أعرفها من عبايتها .

الزبدة:

• أخي الكريم ....... و بعدين ؟ تقطعت عبايات بنات الناس من عيونك .
• متى نفهم إنه مسمى ((سيدة عاملة)) أو ((موظفة)) ما هو مرادف لمسمى ((صايعه)) أو ((رقاصه)) .
• متى نخاف الله و نعامل بنات الناس زي ما نبغى الناس تعامل أهالينا ؟
• متى نحترم أمانتنا الوظيفية .. و نحترم مكان عملنا ؟

..... عجبي