فن الإعلانات البايخه

أحياناً تزعل إنه ربي رزقك شوية وقت فاضي تتفرج فيه على التلفزيون .. مره مسلسل كويتي إثنين فيه يموتوا كل خمسه دقايق .. و مره حروب و مجازر .. و مره مباراة فريقك فيها يأكل على رأسه ..... بس أكثر شي كرهني في التلفزيون هو الإعلانات .

تكون جالس في أمان الله شويه يطلعلك هذا الإعلان

و الله واحد كتبها في التعليقات على الفيديو .. جاااابها جييييب .. الأخ حفظه الله كتب تعليق "سماااااااجة ... تباً لكم دبلتوا تسبدي" .

العصير إسمه باربيكان ((بار)) بالألف .. و الأخ يقول ((بيربيكان)) ... أي أغنية ؟ و هذا من فين جايب نظارته إلي كأنه المرحوم سيد مكاوي في فريق الناشئين .. جاااابها على الجرح و الله إلي قال ((دبلتوا تسبدي)).

نخلص من أبو رمان و نظارة جنان و نروح للنظافة .. جااايبلكم إعلان بيكرهكم في النظافة .. بتجيكم عقدة من الحمامات و بتصيروا تسووها ((أقصد البي بي على قولة أحمد حلمي في فيلم 1000 مبروك)) في السطح بعد هذا الإعلان

آسف على الجودة .. بس هذا إلي لقيته .. أحمدوا ربكم جايبلكم شي يرفع ضغطكم .

يقول الورع: عيدك سعيد يا بابا
يقول الأب الأطنخ: ((أواه))

((أواه)) ؟؟؟ من جد ؟؟ .. ((أواه)) ؟؟ كيف يعني ؟؟
ما عمره أبوي قالي ((أواه)) و لا كان تبريت من سلالتي و وأدت نفسي .

أتركوا ((أواه)) ... شوفوا سؤال الأم ((تنبيه: الإعلان لا يذكر شي عن هذه السيدة و علاقتها بالورع أو الرجل الأطنخ .. و لكني أفترض من حسن نيه أنها أم الورع)).

الأم تسأل الرجل الأطنخ: ((بيدك ؟)) لا يا حلوه .. برجله .. لا يا مدام .. بكوعه .. وضحي أول إيش علاقتك بالرجال بعدين أسألي براحتك ((أواه)) .

نترك سؤال السيدة مجهولة الهوية .. شوفوا إجابة الرجل الأطنخ .. لاحظوا حركة يده ((ما تخوفي)) .. يا ولد يا مدرك الأمور .. لا طمنتني الله يطمنك .

ليش لابس بالطو ؟ وقفوا الصورة في الثانية 5 .. مكتوب وراه AREA بس مو واضح AREA حقت إيش .. هل هذا له علاقه بـAREA 51 الموجودة في أمريكا و إلي قالوا إنه فيها مخلوقات فضائية فاتحين مقهى إنترنت و كبينة إتصالات ؟ ليش اللوحة لونها أخضر و أبيض .. مؤامرة على السعودية ؟ ما أقول غير ((أواه)) .

نترك الرجال و ولده و الحرمه مجهولة الهوية في مشاكلهم .. و نروح لإعلان ثاني

إنا لله و إنا إليه راجعون .. ليه كذا ؟ مين دافع حق الإعلان هذا ؟ مين كاتب القصيدة الملحمية هاذي ؟ إيش اللحن هذا ؟

أرفض و أمتنع عن التعليق على هذا الإعلان .. بس بأترجم بعض الكلمات ...

إيههي : إيه هيا – حافادا : حفاضة – تيفلي : طفلي – قاف : جاف – تسنام : تنام ((الظاهر إلي تغني قصيميه)).

أما الآن .. مع مفاجأة الموسم .. إعلان الألفية الجديدة .. الضغط و السكر و الملح و القولون و ألم الأسنان و الروماتيزم مضمون مع هذا الإعلان .. 4 دقايق و 13 ثانية من الإستفزاز المستمر

مقتطفات من الإعلان:

• يقولكم الأخ ناجي حسن "أهلاً بكم في حلقة جديدة" مسلسل تركي ؟؟ سانشيرو ؟؟
• الثانية 16 .. يقول "حتودوار" كيف يعني ؟؟
• حيحمينا من أمراض كثير "ممكن تأذي البني آدم" .. صح .. فيه أمراض ما تإذي البني آدم .. أمس الدكتور وصفلي مرضين أخذهم قبل الأكل علشان أتعافى .
• "ممكن تجيلنا أكيد عن طريق الميه إلي بنشربها" .. ممكن و أكيد سوى .. بارك الله فيك .
• "لما نيجي نملى كوباية ميه نلاقيها لونها أبيض" .. هذا حليب يا كابتن .
• يقووول الأخ .. الفلتر يشيل "الأسمدة" من المويه .. مواصير بيتكم موصله بمزرعة جرجير ؟ إيش جاب الأسمدة ؟
• "يخلي السموم في الموية نسبتها قريبه من 99%" .. و نعم الإعلان .. متخرج تسويق أكيد ؟
• "السعر بتاعنا لا ألف و لا ألفين" .. منطق .. لو ما كان ألف .. أكيد ما راح يكون ألفين .
• أهــــــــــــــــم شي .. أهممممم شي .. هاذي النقطه إلي قالها في الأخير "لازم نحافط على صحتنا علشان مصر بعد 25 يناير" يا فاهم في أساليب التسويق إنته يا حدق .. أموت في الوطنيه .......

الزبدة:

ما في زبدة .. مجرد .. رفعة ضغط ......

..... عجبي