أعاني من مشكلة في النوم من فترة .. ما يجيني النوم إلا بعد حروب مع المخده و ساعات أتقلب فيها و لا دجاج الشواية في مطاعم البخاري .
و قبل فترة و أنا في عز الحروب مع المخدة جا على بالي سؤال .. ((في المتوسط .. كم مره في اليوم في عز سواليفك يطنشك شخص علشان يطالع في البلاك بيري؟)) للأسف ما ساعدني السؤال هذا على النوم .. بالعكس سهرني كمان ساعة ، جلست أفكر فيها .. و أعد .. و أحسب .. إلييييين ما إنخمدت.
ثاني يوم قمت و لسه في بالي السؤال و قررت أخليه سؤال الأسبوع .. وصلت العمل و بدأت أسئل كل شخص أقابله نفس السؤال و أسجل الإجابات ، في نهاية اليوم طلع المتوسط ((مرتين)).
مرتين في اليوم يتم تطنيش شخص في نص سالفته بسبب البلاك بيري .. مرتين في اليوم الناس ((تنسحب)) أو بمعنى آخر ((تلقط وجهها)) أو في قول آخر ((تنصف)) علشان البلاك بيري .. فين الحكومة عن الموضوع هذا ؟ أتركوا عنكم سيول جدة و حوافز البطالة و الراتبين .. خليكم في البلاك بيري .
أحكيكم موقف متعبني نفسياً إلى اليوم ..
واحد من الشباب كنت مديره المباشر حوالي السنه و بعدين كل واحد فينا راح في طريقه .. بعدها بستة شهور سمعت من واحد من الزملاء إنه زواجه بعد أسبوعين و عزم الناس كلها .. بس أنا ما وصلتني عزيمته.
قلت و الله بكيفه .. ماني حاضر إذا ما إتصل بي أو أرسلي رساله .. و عدى الزواج و الرجال ما عبرني ، بعد الزواج بأسبوع إتصل بي ((وينك ؟ عيب عليك ما تحضر .. إلخ)) قلتله و الله إنت ما عزمتني و ماني جاي من دون عزيمه .. من زينك و لا من زين عشاك.
قلي ((يا أخي أرسلت العزيمة في البلاك بيري .. بالله ما وصلتك ؟؟)) .. طيب أنا ماني من أمة البلاك بيري .. أنا آي فوني .. مالي عزيمه ؟؟ أنا متخلف .. ما ينفع أحضر زواجكم ؟؟
جلست مره مع أحد أفراد الحزب البلاك بيري و سألته .. إيش الدوشه هاذي كلها على البلاك بيري ؟ إيش إلي مرررره يحمسك على البلاك بيري و يخليك أربع ساعه و عشرين حاط عينك فيه ؟
و كانت الإجابة إنه فيه نظام زي نظام الشات و القروبات و رسايل و صور و فيديوهات و إقتباساً من كلامه "فله" .
سألته .. طيب ليش أعضاء حزبكم يطنشونا في نص كلامنا و يطالعوا في البلاك بيري .. ما ينفع إنه "الفله" تنتظر إلين بعد نهاية الحوار ؟
رفع عينه من البلاك بيري و كانت إجابته ((.... ها؟)).
.... عطيته ظهري و مشيت .
للأسف كان ودي إني أتعرف على هذه الفئة أكثر .. هل لهم توجهات سياسيه ؟ ليبراليين ؟ إسلاميين ؟ بس الرجال كان مشغول "بفلته".
الزبدة:
- على رأسي البلاك بيري و إلي يستخدموه بس يا عالم خلونا نستمتع بإلي بقي من التواصل الحي على الهواء مباشرة .. يكفي إنه ثلاثه أرباع تواصلنا ما بين فيس بوك و مسن و تويتر و مسجات و جوال و سكايب و شات.
- إذا جيت تكتب على البلاك بيري .. لا تكلم نفسك .. ترى شكلك مو حلو أو بالأحرى ((مو طبيعي)).
- إذا كنت ماشي في الشارع سواء على رجولك أو بالسيارة و حبيت تلعب في البلاك بيري الله يخليك (((((أوقف))))).
.... عجبي
