الزواج



الحمدلله ربي أنعم علي بثلاثة أخوان ينطبق عليهم المثل ((رب أخ لم تلده أمك)) .

الأول بنفس عمري .. تزوج من ثلاث سنوات و من يوم ما تزوج كل ما قلتله ((مشغول مع أهلي)) يقولي ((إيش عندك ؟)) و المعنى من هاذي الجملة ((دامك منت متزوج ما عندك شي ، و لا تقول أهلي و أهلي)) ، فصرت كل ما كلمته في شي قلتله ((تدري .. أنا مشرد ما عندي أهل و لا ورايه زوجه .. فخذني على قد عقلي)) .

الثاني مديري في العمل .. هندي .. أكبر مني بثمنيه سنوات .. 3 سنوات من يوم ما جا السعودية دايماً نطلع سوى و نسهر سوى .. تزوج قبل 9 شهور تقريباً .. و من يوم ما تزوج فــجــأه شاب نص شعر رأسه و صرت كل ما قلتله شي يقولي ((إنتوا شباب)) .

الثالث أصغر مني بسنه .. ملكته كانت قبل شهرين و إن شاء الله زواجه في شوال .. من بعد ملكته بيوم صار كل ما جلسنا مع بعض يقولي ((ها .. ما نويت ؟ ما بقي إلا إنت)) مدري هذا إذا تزوج إيش بيسوي فيني .

صرت أحس يوم أجلس معاهم إني مختلف .. كأنه عندي عنقز ((مرض معدي يظهر على شكل حبوب على الجسم)) .. كأني منحرف .. طايش .. غير ناضج .

 

عندنا شغالة من أكثر من 30 سنة ، كانت شغالة جدتي و مستمره معانا مع إن جدتي متوفيه من 15 سنه ، لها تقريباً سنتين كل ما أقابلها تفتحلي ثلاث مواضيع و كل مره بنفسسسس الترتيب ...

الأول "ذكريات" : ما شاء الله يا عبود صرت رجال .. أتذكر لمن كنت صغير تجي تطفشني في المطبخ ((يا خاله مريم سويلي فطور يا خاله مريم وديني البقاله)) .

الثاني "حزن" : الله يرحمها جدتك و الله كل يوم أفكر فيها .

الثالث "مستقبل" : متى أفرح فيك و أرقص في زواجك .. تعرف قريبتك هاذيك ؟ و الله حلوه و مؤدبه .. أخطبلك إياها .

يعني حسب منطق خاله مريم .. مدام قريبتي حلوه و مؤدبه .. لازم أتزوجها .

قبل فتره جالس في العمل قبل نهاية الدوام بساعة و ما عندي لا شغله و لا مشغله فقلت فرصه ألفلف على الأقسام .. دخلت قسم التسويق و جلست أسولف مع أبو أحمد و شوي فتحلي سالفة الزواج ..

أبو أحمد : ها يا أبو عابد .. متى نفرحبك .
أنا : شايفني جالس على قلبك .. خليني في حالي يا أخي .
أبو أحمد : جد و الله متى ناوي تتزوج .
أنا : إن شاء الله بعد الماجستير ((تصريفه)) .
أبو أحمد : يا أخي تزوج و أدرس إيش المشكلة .
أنا : ما في مشكلة بس لسه ما نويت .
أبو أحمد : فيه شي مانعك ؟ عندك مشكله ؟
أنا : ((رفع ضغطي)) .... مشكله .. زي إيش تقصد ؟؟
أبو أحمد : ماليه .. نفسيه .
أنا : ....... الشرهه على إلي يجي يجلس معاك .

طلعت من قسم التسويق و قلت مالي إلا قسم تقنية المعلومات أكثرهم هنود و مديرهم أكبر مني بخمسه سنين و إلى الآن ما تزوج ما أظن بيفتحولي هذا الموضوع ، دخلت القسم عندهم و خاب ظني ..

عبدالباري : ما سمعت الخبر يا عبدالله ؟ عبدالباسط خطب و زواجه بعد 4 شهور .
أنا : ما شاء الله .. ((بأضيع الموضوع)) المهم إنتوا كيف الشغل معاكم ؟
عبيد : يالله ما بقي إلا إنت و مديرنا .. متى إن شاء الله ناوين ؟
أنا : زوجوا مديركم بعدين تعالوا كلموني .
مديرهم : أنا إخترت العروسة و إن شاء الله السنه الجايه الزواج .. و إنت .
أنا : أوووه نسيت جوالي في مكتبي .. أمر عليكم بعدين .

ما أدري .. علشان أهرب من هذا الموضوع فين لازم أروح ؟ إيش لازم أسوي ؟ أحياناً أفكر أتزوج بس علشان أرتاح من هاذي الدوشة .. يرضيكم ؟؟؟

الزبدة :

• ما أدري ليش عندنا عقدة من إن الواحد يوصل 25 سنه و هو لسه ما تزوج .
• ليش أي واحد يوصل 25 سنه و هو لسه ما تزوج يعتبر يا عنده مشكله عائلية .. يا مريض نفسياً .. يا مفلس ؟
• ليش دايماً العزوبية مربوطة بالطيش و الفراغ ؟
• ليش دايماً الإجابة على سؤال ((الحالة الإجتماعية)) بكلمة ((أعزب)) لازم يجي بعدها سؤال ((ليش ؟)) أو ((متى إن شاء الله ؟)) .

... عجبي .