إنجلش بليز

 

 

أمس كنت جالس أمارس عادة مراجعة ملاحظاتي و كنت أقرأ  ملاحظة ((المنتديات .. عربي شويه شويه)) و أنا أقرأ الردود خطرت في بالي فكرة هاذي الملاحظة .

ما قد جلست في مقهى ترتشف بعض الشوكولاته الساخنه و لا شاهي عدني و سمعت جنبك إثنين يتكلموا إنجليزي مكسر .. و يوم طالعت لقيت إنهم سعوديين برخصه و إستمارة ((يعني قلباً و قالباً)) ؟

ما قد رحت مطعم و لقيت واحد سعودي يطلب بالإنجليزي .. مع إن إلي يشتغل في المطعم من جنسية عربيه ؟

آخر مره غيرت حالتي في الماسنجر إلى متصل كانت تقريباً قبل سنتين و السبب إني كل ما حطيتها متصل تبدأ الناس ترسلي و في أكثر الأحيان تبدأ كلامها بوحده من جملتين "Hey Abdullah, it has been a long time" أو "3body.. esh a7'bark, fenak ma tenshaf" و المشكلة أبعد واحد موجود عندي في الماسنجر ساكن في الرياض .

قبل كم يوم أمي تناديني ..

أمي : عبدالله تعال دورلي مسلسل ((بعدك طيب)) في اليوتيوب .. فاتتني حلقة أمس

أنا : سمي .. وين اللاب توب يا مامي ((أدلع أم عبدالله))
أمي : مع أخوك
أخوي : ما لقيت المسلسل يا أمي

أخذت اللاب توب منه .. و هاذي صورة لبحثه في اليوتيوب .

 

 

قبل فترة جالس مع واحد من أكبر العملاء في شركتنا .. سعودي و عنده ولد عمره 3 سنوات .
كان يحكيني عن ولده و عن تجربة الأبوة .. و شوي قالي إنه الكلام خلاه يشتاق لولده و إستأذن مني إنه يتصل عليه يكلمه .

هو (يكلم زوجته) : عطيني عبدالعزيز خليني أسلم عليه .

هو : بأفتح السبيكر أخليك تسمع صوت ولدي .
أنا : (بإبتسامة) طيب .
هو : عزوز .. How are you?

عبدالعزيز : I miss you daddy
هو : I miss you too, had you'r breakfast?
عبدالعزيز : Yes daddy

أنا هنا جاني القولون و الضغط و الحموضه و كل أنواع الأمراض المستعصيه .. كان ودي أعطيه كف أخليه بدل ما يتكلم إنجليزي يتكلم هندي .. بس مسكت نفسي و تصنعت إبتسامتي إلين ما إنتهى الإتصال البايخ هذا و سألته .

أنا : ما شاء الله الإنجليزي حق ولدك ممتاز .. زوجتك أجنبيه ؟

هو : لاااا بس جايبين له شغاله فلبينيه تعلمه .
أنا : بس إن شاء الله العربي حقه تمام ؟
هو : ما يتكلم عربي ، بس مو مشكله العربي .. يتعلم إذا دخل المدرسه .
أنا : آها ............ طيب .

ما أعرف .. هل صار عيب نستخدم لغتنا العربية لغة القرآن الكريم ؟ هل صار عيب نستخدم اللغة إلى قال فيها الشاعر حليم دموس ..

 

لو لم تكُنْ أمُّ اللغـــاتِ هـيَ المُنى  ***   لكسرتُ أقلامي وعِفتُ مِدادي
لغـةٌ إذا وقعـتْ عـلى أسماعِنا  ***   كانتْ لنا برداً على الأكبادِ
سـتظــلُّ رابطــةً تؤلّــفُ بيننــا  ***   فهيَ الرجـاءُ لناطـقٍ بالضّادِ

 

أنا أول واحد أطالب و أرجو إن الكل يتعلم إنجليزي الللله يخليكم تعلموا إنجليزي لأنه بدون الإنجليزي صعب الواحد يعيش في عالم صار مفتوح على بعضه و صارت فيه معرفة اللغة الإنجليزية شيء أساسي زي معرفة الكمبيوتر .

لكن معرفة الإنجليزي أبداً مو معناها إننا ننسى لغتنا أو نتجنب إستخدامها ظناً إننا بهاذي الطريقة بنظهر قدام الناس متعلمين أو فاهمين أو محد قدنا .. بالعكس ، شخصياً أستحقر شخص عربي يكلمني إنجليزي بدون سبب .

صحيح في بعض الأحيان فيه مصطلحات علمية أو عمليه من الأسهل لنا و للمستمع إننا نقولها بالإنجليزي و في هاذي الحالة ما هو عيب نقولها بالإنجليزي .. لكن إستخدام الإنجليزي علشان تحكي شخص عربي زيك زيه إيش سويت أمس أو إيش رأيك في الفيلم إلي شفته قبل أمس برأيي الشخصي موضة جديدة ما لها أي هدف و أي معنى .. و سبب جديد من أسباب إرتفاع الضغط .

الزبدة :

• لكل مقام مقال .. إذا كلمت أجنبي كلمه إنجليزي .. و إذا كلمت عربي كلمه عربي .
• إذا كنت ما تعرف إلا 3 كلمات إنجليزي رجاااء لا تحرج نفسك و تستخدمها في كل جملة بمناسبة و بدون مناسبة .
• لا تقول لغتي العربية ضعيفة علشان كذا أستخدم الإنجليزي .. قوي لغتك العربية بكثرة إستخدامها .
• في الفترة الماضية مرت علي فئة جديدة مو بس تتكلم إنجليزي .. الفئه هاذي حتى إذا تكلمت عربي تستخدم مخارج الحروف الإنجليزيه ، فإذا كنت حاب يجيك مرض مزمن و تموت ناقص عمر حاول تبحث عن هاذي الفئة .

.... عجبي .