بداية إسمحولي أقول بعد طول غياب أخيييراً "عدنا و العود أحمد" .
بداية إسمحولي أقول بعد طول غياب أخيييراً "عدنا و العود أحمد" .
سامحوني على الإنقطاع عن ملاحظات بس مثل ما إنتوا عارفين بعد ما صار عندنا بسه كثرت المسؤوليات ، طول النهار في الشغل و في الليل يا ألعب أنا و البسه يا أاكلها يا أنظفلها ترابها (و إنتوا بكرامه) ... و غير كذا "كالعادة" تركت شغلي القديم و إنتقلت لشركة جديدة .
المهم .. ندخل في الموضوع .. ملاحظة اليوم .
أحلى شي في الدنيا إنك تكون منت عايش مع أبوك أو أمك لأي سبب من الأسباب .. سواء كان بسبب طلاق أو وفاة واحد منهم "الله لا يكتب ولا وحده فيهم على مسلم" .. طبعاً يتبادر لأذهانكم سؤال منطقي و فطري .. ليش تقول كذا يا أبو عابد ؟
و إسمحولي أقتبس الكلمات الحكيمة و البليغة للدكتور أبو نظارة على الحرمه مجهولة الهوية في إعلان صابون لايف بوي المرفق أدناه (قدموا الفيديو إلى الثانية 7) للرد على سؤالكم ..
((ما تخافوا)) ، قصدت بكلامي إنه الشخص إلي يكون أبوه و أمه منفصلين أو لا قدر الله واحد منهم متوفي يعطيه المجتمع تذكره مفتوحه للفشل .. لو ما نجح في دراسته قالوا "مسكين .. من حقه .. أهله منفصلين" ، لو أهمل في عمله قالوا "يا حياتي .. من حقه .. أبوه متوفي" ، لو سرق .. لو شرب .. لو قتل قالوا "يا حرااام .. يحقله .. نفسيته تعبانه .. جاي من بيت مفكك" .
ما أدري ليش دايماً الربط هذا .. صحيح هذا الوضع بيأثر على أي شخص سواء سلباً أو إيجاباً بس مو معناه إنه يستخدمه شخصياً أو يسمح للمجتمع إنه يستخدمه كعذر له سواء في ضعف دراسي .. ضعف في الحياة العملية .. أو فشل إجتماعي .. إلخ .
أقولكم قصة .. كان يا ما كان .. واحد من الشباب ما شاء الله عليه متميز في عمله و ناجح و علاقته بأهله ممتازه مع إن أبوه و أمه منفصلين من يوم ما كان عمره 9 سنوات ، و أخوه إلي أصغر منه سبحان الله العكس مهمل في دراسته و علاقته بأهله زي الزفت .
مره سمع خاله و أمه يتناقشون في حال أخوه و إهماله في دراسته و قلة أدبه في التعامل معهم فعصب الرجال ..
هو : سامحني و الله يا خالي على إلي صار من أخوي .. هذا قليل أدب ... أنا أتفاهم معاه و أوريه شغله و أخليه يجي يبوس رأسك .
الخال : لا حرام .. لا تكلمه و لا تقوله شي ، أخوك معذور .. نفسيته تعبانه لأنه عاش طفولته بعيد عن أبوك .
هو : طيب مو أنا زيه و الحمدلله ما عمري رفعت صوتي عليكم و لا أهملت في دراستي .
الخال : لا يا إبني .. إنت غير .
كيف يعني غير ؟؟ غير .. زي جدة مثلاً ؟؟ و لا أخوه من الثديات و هو وحيد الخلية ؟؟
الأعذار سهله و كل واحد يقدر يتعذر .. يا بحالة إجتماعية .. يا بحالة نفسية .. أو بجنسية .. أو حتى بجنس بس هل تفيد الأعذار ؟ هل تأكل عيش ؟ تفتح بيوت ؟
على قد ما الأعذار سهله .. بس التعايش مع الحقيقة صعب .. و الفشل مهما كانت أسبابه طعمه مر و لا حلاوة سكيتلز الخضرا ((ملاحظة: جربوا هاذي الحلاوة .. تعور البطن)).
و زي ما هي الأعذار سهله .. حتى النجاح سهل .. صح يبغاله شغل و جد و تعب بدني و ذهني .. لكن إلى يذوق طعم النجاح مهما كان حجمه بعد كذا ما يحس بأي تعب و يسهل عليه كل شي لأنه عارف إنه النتيجة تستاهل ، و إلي يذوق طعم النجاح مره .. ما عمره يشبع منه أو على قول شيخ البطاطس عمنا برينجلز .. لما تفك ما حتسك.
فنصيحتي لك إذا كنت من الفئة إلي تكلمت عنها "من يعيش بعيد عن أحد والديه أو بعيد عن كلاهما لأي سبب" .. فإستغل الموضوع و بعد كذا لا عمرك تنزل تشتري لأصحابك من البقالة .. لا عمرك تعزم أحد على العشا .. لا عمرك تذاكر .. و لو أحد سألك قوله "نفسيتي تعبانه" .
الزبدة :
- أحمد ربك على كل شي .. و خلي وضعك "مهما كان" دافع للنجاح .
- حتى لو المجتمع نفسه عذرك على زلة أو فشل .. لا تتقبل الأعذار و حاسب نفسك .
- إن شاء الله بأحاول قد ما أقدر ما أكرر الغيبه ((محد سألك)) .
... و سلامي .
