خذوا الحكمة من أفواه الملاحظين

 الله يعطينا و إياكم خير هاذي العشرة الأواخر من هذا الشهر الفضيل .. إسمحولي أستغلكم و أطلب منكم تدعوا لأخوكم بالهداية و الصلاح.

ندخل في ملاحظة اليوم .. ما أدري ليش في أيام هذا الشهر الفضيل صاير عاطفي حبتين و داخل في مود محاسبة للنفس و إسترجاع للماضي ، و اليوم و أنا جالس أسمع كتاب صوتي بإسم "100 طريقة لتحفز نفسك و تغير حياتك إلى الأبد" تذكرت جدي الله يرحمه ، كان مثال للبدوي العنيد .. أو للتحديد أكثر كان مثال للقصيمي أبو رأس ناشفة ، مع إن نظره كان ضعيف جدددداً لدرجة إنه تقريباً أعمى كان طول النهار يجلس في غرفته و معاه عدسه مكبره - من هذا النوع إلي ينحط على الورق مباشرة - و يجلس يقرى .. حرف حرف ، و كل ما قرى شي يعجبه طلع دفتر من دفاتره و كتب إلي قراه لحد ما صار عنده أكثر من 15 مجلد مليانه إقتباسات و مقولات و قصص و قصايد.

كان يجيبني و أنا صغير عمري ما يتعدى 9 سنين و يطلب مني أقراله قصايد و بعدين يجلس يفهمني معانيها .. و أنا أسوي يعني يعني إني مهتم علشان آخرتها بيعطيني حلاوه مصاص من أبو ربع ريال ، و كان أول بيت شعر حفظني إياه ...

سلام على الدنيا إذا لم يكن بها *** صديقاً صدوقاً صادق الوعد منصفا
"الإمام الشافعي"

و يمكن بسبب هاذي التربية و النشئة صرت مهتم بالحكم و أحاول أجمعها من أي مصدر و بأي شكل .. و اليوم إسمحولي أشارككم بمجموعة من أكثر الحكم القريبة لقلبي .. و من أولها أقولكم ((لا تتوقعوا حكم ناس عاقله أو حكم من مصادر إعتيادية .. توقعوا تقروا أشياء غريبه يــــمــــكـــن يتفق معي البعض و تكون مصدر إلهام له .. و أكيد فيه  فئة بتعتبرها تخاريف و كلام فاضي)).

• إنت أمي

إسمحولي أحكيلكم بإختصار قصة هاذي المقولة إلي لها أثر كبير في نفسي ، واحد من الشباب كان خاطب بنت و بحكم علاقتنا القوية كان يحكيني عن أيام الخطبه و المكالمات و حركات الإنحراف حقته هو و زوجة المستقبل ، و توفت أم خطيبته الله يرحمها بحادث سيارة و تعبت نفسية البنت كثير و تأجل الزواج .. و كان يحكيني عن خطيبته و قد إيش تأثرت بموت أمها و يقولي إنه نص مكالماتهم هي تبكي و هو يواسيها و يهدي عليها .. ومره من المرات حكالي إنها قالتله "إنت أمي" فهو ما فهم المغزى .. غزل ؟ تريقة ؟ مزح ؟ إيش تبغى هاذي بالضبط ؟ فرد عليها بمزح "لا لا ما أبغى أصير أمك .. بعدين ما ينفع أتزوجك" فضحكت و قالتله "أقصد .. إنت عندي بغلاة أمي يا دلخ ، و إنت تدري بغلاة أمي".

فيه غزل أطهر و أحلى من هاذي الكلمتين ؟؟ لو فيه يا ليت تقولولي لأنه ما عمره مر علي .. أدعوا للبنت و أمها بالرحمة .. توفت البنت قبل 3 سنوات .. و لليوم صاحبنا ما تزوج.

• من قال "لا أعلم" فقد أفتى

فيه ناس كل ما قلتله شي هز رأسه و قالك "إيوه عارف عارف" و لا كل ما سألته عن شي تفلسفلك نص ساعة فلسفة ما لها معنى و لا فايدة ، يا أخي قول ما أعرف .. مو عيب و لا حرام ، قال الشعبي : ("لا أدري" نصف العلم).

• ليس بالضرورة أن كل من يموت كان حياً "Every man dies.. Not every man truly lives"

هاذي المقولة أتذكرها كل يوم في تعاملي مع أي شخص .. تخيل إنك مت ذحين .. هل فيه أحد بيتذكرك ؟ هل لك إنجازات تذكر الناس فيك بعد سنه .. سنتين .. عشرة ؟ هل حققت شي في حياتك يخليك تقدر تقول "أقدر أموت و أنا راضي" ؟ هل عاملت الناس بطريقة تخليهم يتذكروك بالخير؟

• الإتقان في التنفيذ "Excellence of Execution"

للمتابعين يمكن ما أكون قلت شي جديد إذا تكلمت عن عشقي للمصارعة إلي يتعمق لأكثر من الفرجة و يوصل للتحليل و البحث من سنوات الطفولة ، و من بداية حياتي العملية قررت إني أحط قدام عيني دايماً هاذي المقولة إلي كانت تنقال عن المصارع بريت هارت خلال تنفيذي لأي عمل.

الإتقان ما هو مربوط بنوع العمل أو المهمة .. الإتقان أسلوب حياة يحطه الواحد لنفسه و يطبقه في كل شي يسويه ، و أحلى ما في الموضوع إنه الواحد لو حاول دايماً يتخذ هاذي المقولة كأسلوب حياة مستحيل يوصل لرضى تام عن نفسه و دايماً بيسعى للتطوير .. و هذا هو المطلوب.

و في حديث ضعيف .. قال رسول الله صلى الله عليه و سلم : (إن الله يحب إذا عمل أحدكم عملاً أن يتقنه). 

• لكل شيء بداية .. و لكن "واحد" ليس هو البداية

إسمحولي أترجملكم هاذي الكلمات ..

لكل شيء بداية .. و لكن "واحد" ليس هو البداية ، إنه يبدأ قبل ذلك بكثير .. كل شيء يبدأ من الفوضى .. كل شيء يبدأ من "الصفر".
عندما يصبح "الصفر" "واحد" يبدأ كل شيء في النمو .. الواحد يصبح إثنين .. الإثنين تصبح عشرة .. العشرة تصبح مئة ، إعادة كل شيء إلى "واحد" ليس هو الحل .. مادام "الصفر" موجوداً فسنصل إلى مئة مرة أخرى.
لذلك كان هدفنا أن نلغي "الصفر" و نعيده إلى "العدم".
"ميتل جير سوليد 4"

بعد ما أعطيتكم حكم من المصارعة .. من كلام المخطوبين .. وصلنا لألعاب البلاي ستيشن :) ، قايلكم من البداية الحكم إلي موجودة هنا ما هي من مصادر إعتيادية.

أتذكر هاذي الكلمات دايماً إذا واجهت مشكلة .. أحياناً الناس تنظر للمشكلة بحجمها الحالي و ما ترجعها لأصلها .. برأيي إعادة الأمور لأصلها و بدايتها يسهل عملية التعامل معها ، يمكن هاذي الكلمات معناها يقارب نظرية تحليلة إسمها نظرية "5 Whys" و معناها إنك تسأل نفسك "ليش ؟" 5 مرات علشان تقدر توصل لأساس الشيء ، مثال ...
أنا دب .. ليش ؟ لأني أكل أكل غير صحي .. ليش ؟ لأني أكل وجبات سريعة كثير .. ليش ؟ لأني ما أحب طبخ البيت .. ليش ؟ لأن أهلي ما يطبخوا أكلات أحبها .. ليش ؟ لأنهم يطبخوا على مزاج الوالد .. و الوالد أهم مني .. و مدام الوالد راضي طز فيني.

• القائد لا يصنع التابعين و لكنه يصنع المزيد من القادة "Leaders don't create followers, they create more leaders"

قبل شهر و نص قبل ما أطلع من عملي القديم سحبني مدير الموارد البشرية عنده في المكتب يسألني عن سبب إستقالتي .. قلتله عرض أفضل و شركة عملاقه فوافقني الرأي و بعدين قالي نصيحة "يا أبو عابد إنت ولد الشركة فبأقولك نصيحة تنفعك في مستقبلك .. لاااا تعطي كل إلي عندك للشغل و لا تعلم أحد كل شي علشان ما يمسكوك الباب" .. هزيت له رأسي و شكرته على النصيحة و طلعت.

برأيي الكلام هذا غير صحيح مليون في المية .. الشخص الواثق من نفسه و إلي يعرف قيمته و يعرف إنه إضافة لمكان عمله ما يخاف إنه يعلم .. بالعكس .. يعلم و يفيد و يطور كل إلي حوله علشان هو كمان يتطور ، بنظري الإنجاز ماهو إنك ممتاز في عملك و بس لكن الإنجاز إنك تطور من حولك بحيث إنهم يصيروا ممتازين زيك علشان تقدر إدارتك ترقيك و تستفيد منك في مكان ثاني و يكون فيه أحد كفء يعبي المكان بعدك.

و لوووووو فعلاً كان فيه شركة عندها هذا التفكير و بتفصل شخص علشانه علم غيره و فيه موظفين ثانين يقدروا يأدوا عمله .. طز في هاذي الشركة و إذا الشخص فعلاً مميز بيلقى مليون شركة تترجاه يصير جزء منها.

• لا تذكرني في الهامش إذا كنت أستحق مجلداً "Don't give me a footnote when I deserve a chapter"

من أجمل المقولات إلي قريتها في موقع التصميم المشهور DeviantArt
لا تبخس نفسك حقها .. إذا كنت تستاهل الشي طالب فيه و لا تنتظر أحد يعطيك إياه أو يحطه بين إيدينك.
 

• "باللهجة المصرية" و أنا ويايا بعيش زي المليونيرات ... و أحلم و أنا معييش ما ألعنش الأزمات

و أنا ويايا بعيش زي المليونيرات
و أحلم و أنا معييش .. ما ألعنش الأزمات
مجنون .. و جناني ده عين العقل ... العقل ده داء بيعيي
و جناني ده شيء مش سهل ... تقدر تتجنن زيي !؟
أنا أحب أسهر للصبح و عمري ما أروح بدري
و بصاحب كل الخلق .. البيه صاحبي .. و الفقري

فيه ناس إذا ربي فتح عليه قام يفكر و يحسب لبكره و يخطط و يرتب .. و إذا ربي ضيقها عليه شوية برررضه قام يحسب و يفكر و يخطط .. يا أخي عيش حيااااتك .. إستمتع .. إنبسط .. على قولة المثل الشعبي "فلها .. و ربك يحلها".
ما أقولك لا تخطط و تفكر لكن لا تشيل الدنيا على رأسك طول الوقت.

من أغنية قدييييييمة لمدحت صالح "أمتنع عن وضع الرابط إحتراماً للشهر الفضيل .. الواحد مو ناقص ذنوب".

• لا تشكو للناس جرحاً أنت صاحبه *** لا يؤلم الجرح إلا من به ألم

مقولة الإمام علي بن أبي طالب رضي الله عنه ، ما أقولك لا تشكي .. إذا إنت طبيعتك إنك تقدر تشتكي و تفتح قلبك .. إشكي .. بس لا تتوقع و لا تطالب من حولك بالتفاعل .. كثييييير بتلقاهم يضحكوا معاك إذا ضحكت بس لو بكيت بيكونوا أول من سحب عليك و يطنشك ، فلا تنصدم بردة الفعل هاذي.
و لو تبغى رأيي الشخصي .. لا تشكي إلا لأقرب الناس ، غير كذا .. إكتمها في قلبك.

•  للمصيبة فوائد

من أكبر الصدمات إلي عانيتها في حياتي و تركت فيني بصمة كان موقف صارلي في فترة كنت فيها عاطل عن العمل.
طلعت مع أصحابي و رحنا السوبرماركت نشتري عصيرات علشان جلسة الأفلام الأسبوعية حقتنا .. و بحكم إني عاطل عن العمل من 7 شهور فكنت مفلس و بحكم إنه أصحابي هذول جداً مقربين مني إفترضت بشكل طبيعي إنهم بيدفعوا حساب عصيراتي .. و يوم وصلنا للكاشير إلتفت علي أعز أصحابي و إلي أعرفه و أجلس معاه يـــومــيــاً من أكثر من 10 سنوات و قالي بالحرف الواحد : ((معاك حق عصيرك ؟ ترى ما عندي فلوس)).

التاريخ كان 9 في الشهر .. و كان مستلم راتبه قبل يومين .. و كان حسابي 4 ريال .. و مع إني أنا إلي جبتله الوظيفة إلي هو فيها .. و مع إني من 5 سنين و من يوم ما بديت أشتغل أنا إلي أدفعله في أغلب الأحوال بحكم إنه دخلي كان أعلى من دخله .. و مع كذا قالي هذا الكلام .. ما أقصد أتمنن .. بس علشان أوضحلكم الصورة كاملة.

بإختصار .. المعدن يبان في المصيبه.
 

• Just Bring It

ما عرفت أترجم هاذي المقولة بدون ما تفقد معناها و لكن بأحاول أفسرها بأسلوب شعبي .. هاذي المقولة زي يوم واحد يقولك شي و ترد عليه "ليش لا ؟" أو "ما في ريوس" أو "يجي".

هاذي المقولة هي فعلاً و بلا منازع حكمتي في الحياة .. لا عمرك تتراجع في وجه تحدي أو مشكلة .. إذا جيت تفكر في شي لا يكون أول شي في بالك جملة "بس يمكن .." أو "طيب لو .." ، دايماً حط في بالك كلمات زي "ليش لا ؟" "أجرب" "أتعلم" "إيش المشكلة لو غلطت أو فشلت .. على الأقل بأستفيد و بزيد خبرة".

المصدر .. المصارعة :)

و أخيراً ... شاركونا بحكمكم في الحياة .. مو مهم المصدر حتى لو أفلام كرتون .. المهم المعنى .

... و سلاااااامي .