البزارين عبر الزمن

قرأت قبل كم يوم تدوينه للأخت هتون قاضي بعنوان "أهجدوا يا بزورة" تتكلم فيها عن الفرق بين سلوك عيالنا و سلوك عيالهم (الفرنجه) ، و جت على بالي التدوينه صباح ثاني يوم و أنا أقربع قهوتي الصباحية (القهوه من إعداد و تقديم "يوليسيس") تذكرت كيف كانت طفولتي مليئة بالدلاخات البريئه و كيف كان الوالد الله يحفظه يتفاعل مع الموضوع ... و فجأه .. خطرتلي فكرة هاذي الملاحظة .

قبل فتره يحكينا واحد من الزملاء عن ولده إلي عمره تقريباً 6 سنوات .. يقول إنه تأخر في النوم فتأخر على موعد مدرسة الولد .. جا الولد يصحيه و لمن صحي فرصعله الولد و قاله "يالله يا بابا .. المدرسه .. إنت عبيط يا بابا !!؟"، أول ما خلص قصته تذكرت كيف كنت أسحب رجولي تسحيب و أنا أمشي قدام باب غرفة أبوي و هو يأخذ غفوة العصريه و قد إيش كنت أخاف منه و يوقف شعر سكسوكتي "وسعتها شويه في هرجة السكسوكه" إذا فرصعلي بعيونه .

ما كانت المسأله مسألة خوف بقدر ما هي مسألة هيبه و إحترام .. ما أنكر إنه الواحد كان يأكل علقه محترمه بين الفينة و الأخرى بس ما عمري حسيت إنه الخوف هو سبب الإحترام .

كنت أنا و كل أبناء جيلي من أقاربي نحسب ألف حساب لزعل أبونا أو أمنا .. نبوس رأسهم مرتين في اليوم زي المضاد الحيوي صباح و ليل .. ما نجلس قبل ما يجلسوا .. ما نكسر كلمتهم ، كانت فيه شده في التربيه .. بس الحمدلله جابت نتيجه .

عيال اليومين هاذي ماشين على مبدأ يونس شلبي الله يرحمه "إنته مش أبويه .. إحنا عيال مع بعض" و أكبر مثال على هذا الكلام .. قصه يحكينا إياها واحد من زملائنا الكبار في السن عن موقف صار بينه و بين أصغر أولاده (الولد عمره 7 سنوات) .. و إسمحولي أنقلكم إياها حرفياً ..

الولد : يبه .. وراك شايل ذا العصا ؟

الأب : علشان أكسرها على ظهرك

الولد : تخسي

الأب : و النعم و الله بالشيخ

 

يونس شلبي و أبوه .. عيال مع بعض

أهل الوالده ساكنين في عمارتين جنب بعض .. و طول السبعه و عشرين سنه إلي فاتت عمري ما سمعت إنهم دخلوا سمك لأي شقه من شقق هاذي العمارتين و هذا كله إحتراماً لجدي لأنه ما يطيق ريحة السمك .. فكانت فيه هبقات متعارف عليها في العائله إسمها (هبقات السمك) و يجتمع فيها مدمني السمك من خيلاني و خالاتي و عيالهم و عيال عيالهم و يهربوا إلى أحد مطاعم ثول أو ذهبان علشان يتعاطوا الجرعه .

كانت تربية الأجيال السابقة أشد من تربية الوقت الحالي و أحياناً خاليه من العواطف و التواصل الصحي بين الأبناء و والديهم و مع ذلك كانوا قمه في البر و الإحترام .

أما جيلنا فبرغم كل كتب علم نفس الأطفال و التربيه الحديثه و الأفلام هاذي كلها في الأخير بدل ما الوالدين يربوا عيالهم .. صارت مسألة التربيه بإتجاهين .. الأهل يربوا العيال .. و العيال يربوا أهاليهم .

يشتكيلنا زميل ثالث من ولده إلي عمره 5 سنوات .. يقول إن الولد ما يحب أمه مع إنها تحاول بكل الطرق تتقرب منه ، إذا تضاربت الأم مع الولد .. يروح الولد عند أبوه و يقوله "أنا ما أحب ماما .. خليها تروح تجلس عند جده" .

أول ما قال قصته تذكرت كم مره أمي حرقت دمي و أنا صغير .. كانت إذا زعلت تبطل تكلمني أو حتى تطالع فيني و أنا أصير زي المجنون .. أمسك في رجولها و أترجاها و أحاول أسألها أسئله علشان أستدرجها ترد .. كانت حركه غير قانونيه من أمي و عليها كرت أصفر بس كانت تجيب نتيجه .

و أخيراً .. أختم بقصه إيجابيه هادفه عن طفولتي البريئه ..

أبويه كان معلمني إني أكون ذوق مع الناس و أعزمهم و من هاذي الحركات ، مره كنا مستعدين نطلع البحر و قبل ما نطلع من البيت دق الباب و طلع إن إلي دق الباب خال أبويه جا يتكي عندنا و يشرب مع أبويه كاسة شاهي ، دخله الوالد الصالون و قالي أجلس مع أمي شويه إلين ما يروح ضيفه بعدين بنروح البحر .

بعدها بخمسه دقايق دخلت عليهم الصالون و بكل براءه قلت لخال أبويه "عم محمد .. تفضل معانا .. بنروح البحر" .. الرجال خرج على طول و إعتذر من الوالد لأنه جا بدون إتصال .. و أنا تهزئت تهزيء ما يعلم به إلا ربنا .. و طبعاً يومها ما رحنا لا بر و لا بحر .. يقولولنا خليكم ذوق و مدري إيش و عزموا على الناس .. و بعدين يزعلوا إذا عزمنا أحد .

الزبده :

• برأيي .. إستنساخ جيلنا للكثير من أسس التربية من الغرب هي أساس المشكله ، شوفوا النتيجه .. هم عيالهم يتبروا منهم أول ما يصير عمرهم 18 سنه و مع ذلك برضنا مصرين إنهم صح !؟
• نحتاج بشده إننا نستعير من الأجيال السابقه بعض أساليبهم في التربيه .
• أخاف بكره يوقفونا عيالنا قدام الجدار و يخلونا نرفع رجل .

.. عجبي .