كيف تشتري ؟

واحد من الشباب شغال سواق تكسي في أوقات الفراغ ، رحت معاه و مع صديق ثالث لمكتبة جرير لأنه يبغى يشتري لاب توب يسليه و هو ينتظر الركاب في المطار ، كانت متطلبات صاحبي هي ..

• شاشة كبيرة علشان يقدر يتفرج على الأفلام .
• صوت عالي بحيث إنه ما يحتاج لسماعات إذن أو سماعات خارجية .
• سعة تخزين 500 جيجا .

بناءً على هاذي المتطلبات لقينا جهازين متطابقة في كل شي إلا سعة التخزين و السعر طبعاً ..

• الأول : 500 جيجا بـ4000 ريال
• الثاني : 750 جيجا بـ4300 ريال

أنا إقترحت يأخذ أبو 750 جيجا لأن فرق السعر مو كبير و هو إتفق معي .. بس صاحبنا الثالث كان له رأي مختلف ، سأله ..
- هل تحتاج 250 جيجا إضافية ؟
- لا ، مبدئياً أفلامي كلها على DVD و ما راح أستخدم الجهاز كثير .
- إذاً ليش تدفع 300 ريال على شي ما تحتاجه ؟!

إقتنع و إشترى الجهاز أبو 500 جيجا ، و اليوم و بعد مرور أكثر من 3 سنوات على هذا الموقف .. لا زال صاحبنا ما إستخدم أكثر من 300 جيجا من جهازه ، و أنا برضه ما طلعت من المولد بلا حمص لأني إستفدت درس مهم في كيفية إتخاذ قرار الشراء .

إسمحولي أشارككم في هاذي الملاحظة بعض النصائح و القواعد الأساسية التي تعلمتها في كيفية الشراء ..

إذا ما "تحتاجه" لا تشتريه

المفروض كل شي تشتريه يشبع عندك (رغبة) أو (حاجة) ، و زي ما ذكرت في قصة لاب توب صديقي .. ليش تشتري 250 جيجا إضافية إذا ما كنت تحتاجها ؟

لا تشتري من أول محل .. و لا من أول موقع

لقيت هذا الريموت في معرض Virgin يباع بـ430 ريال ، عجبني جداً و قررت أشتريه لكن بعد ما أسأل عنه في محلات ثانية ، و بعد البحث في جرير و إكسترا و غيرهم .. ما لقيته .
فتحت الإنترنت و بحثت عنه ، لقيته في موقع أمازون بـ50 دولار (187.5 ريال) و مع إضافة تكلفة الشحن يكون الإجمالي 252.5 ريال .. يعني سعره في Virgin أعلى بـ177.5 ريال (زيادة 70% على سعره في أمازون بعد إضافة تكلفة الشحن) .

رتب أولوياتك الشرائية

تبغى ساعة .. و جوال .. و تلفزيون جديد .. و بتدفع فاتورة الجوال و أقساط السيارة .. و .. و .. إلى ما لا نهاية ، إقسم مصاريفك لقسمين مرتبة حسب الأكثر أهمية ..
القسم الأول : (إيش إلي ممكن يضرني لو ما دفعته ؟) و في هذا القسم تحط الأشياء إلي عدم دفعها بيأثر على حياتك زي مصروف البنزين .. قسط السيارة .. سعر الأدوية .. الأكل .. الفواتير .. إلخ .
القسم الثاني : (إيش إلي ممكن يشبعلي رغباتي لو إشتريته ؟) و في هذا القسم تحط الأشياء الغير ضرورية لكن شرائها بيشبع عندك حاجة أو رغبة زي جوال جديد .. جزمة -أكرمكم الله - .. تلفزيون .. شنطة .. إلخ .
إبدأ بدفع كل شي مذكور في القسم الأول ، بعد كذا أترك جزء من المبلغ الباقي كمدخرات (تحويشه) ، و إبدأ بشراء الأشياء المذكورة في القسم الثاني بالباقي .

مو لازم تصرف كل فلوسك مرة وحدة

يجيك واحد يقولك "دفعت فواتيري و مصاريفي الضرورية و حطيت مبلغ على جنب للطواريء .. أبغى أشتري بالباقي كل شي في بالي"
يأخي مو لازم كل شي مرة وحدة ! حسب تجربتي الشخصية .. الأولوليات تختلف مع الوقت ، اليوم حتموت و تشتري ساعة .. بكرة يتغير رأيك و تقول مو مشكلة أأجل الساعة علشان أشتري ملابس جديدة .
إذا ما كان الشي ضروري فقسم مشترياتك على فترات متباعدة خلال الشهر .. مثلاً كل أسبوع إشتري شي ، و أترك بعض الأشياء في القائمة للفترة القادمة .

الجودة أولاً

محتاج شاشة (بلازما) جديدة .. ممكن تشتري شاشة ماركة Class بـ2200 ريال .. و ممكن تشتري Panasonic بـ2800 ريال ، الفرق 600 ريال يعني تقريباً 30% زيادة على سعر شاشة Class لكن فرق الجودة و المميزات و العمر الإفتراضي يستحق إنك تدفع هذا الفرق .. حتى لو إضطريت تأجل الشراء لحد ما توفر المبلغ ، خليك إقتصادي .. لكن لا تسترخص .

عندك صعوبات مالية ؟ إبعد عن المغريات

سافرت الشهر إلي فات و دلعت نفسك و بحبحتها على الآخر .. و ذحين لازم تواجه ديون الكريديت كارد .
لا تفتح أمازون .. إيباي .. سوق .. لا تفتح الرابط إلي جاك في تويتر عن "أفضل إكسسوارات الآيفون" .. لا تروح للمحل إلي سمعت إن عنده تخفيضات 50% ، لا تحط نفسك قدام المغريات لأن النهاية حتكون وحدة من إثنين .. يا تستسلم و تشتري و تزيد على نفسك الديون .. يا تتعب نفسيتك على الفاضي .

على قد لحافك مد رجليك

إذا دخلك 5000 ريال مو لازم تجمع 6 شهور علشان تشتري ساعة قيمتها 6000 .. فيه بدائل ثانية بأسعار أقل بكثير ، و الأشياء الغالية هاذي إن شاء الله في المستقبل يزيد دخلك و يكون عندك القدرة تشتريها بدون ما تأثر على ميزانيتك .

إستفيد من غيرك

قبل سنة إشتريت مكيف General Electric بعد ما أخذت نصيحة الموظف المختص ، المكيف تبريده ممتاز لكن مشكلته إنه مزعج .. و الحمدلله إنه ما يسببلي مشكلة لأن نومي ثقيل ، و قبل فترة إستشارني واحد من الزملاء في موضوع المكيفات و كان ناوي يشتري نفس المكيف .. بس بعد ما حكيته عن تجربتي غير رأيه لأنه من النوع إلي يصحى من أقل صوت .
لا تقرر تشتري إلا بعد البحث و السؤال لأنك ممكن تعيش مع قرارك هذا لسنوات .. زي لمن تشتري ثلاجة أو مكيف .

قررت تشتري ؟ إشتري بكره

بحثت و سألت و لقيت الشي إلي تبغاه بسعر مناسب و قررت تشتري .. إذا ما في شي يجبرك لا تشتريه الآن ، إنوي إنك تشتري بكرة أو على قولهم Sleep on it ، لو صحيت ثاني يوم الصباح و إنت لسه نيتك في الشراء موجودة .. توكل على الله و إشتري .
لأن الواحد أحياناً يتحمس و هو في المحل أو و هو فاتح موقع النت و يأخذ قرار متسرع و يشتري .. و ما يستوعب غلطته إلا ثاني يوم .

لا تحرم نفسك

أغلب الأنظمة الغذائية تعطيك (يوم مفتوح) في الأسبوع تقدر تأكل فيه إلي تبغاه .
طبق نفس الفكرة و حدد مبلغ بسيط من ميزانيتك ما تنطبق عليه أي شروط و إعتبره "للدلع" .. و مع الوقت و الخبرة بتلقى نفسك حتى هذا المبلغ تديره بشكل صحيح .

ختاماً .. إذا إستفدت من الملاحظة لا تبخل علينا بنصائحك الشرائية .
تسعدني متابعتك لـ @Mola7dat في تويتر و تسجيل إعجابك في الفيس بوك .. تلقى الأزرار أعلى الصفحة على اليمين .

.. و سلامي .